ဒီဖြစ်ရပ်ကလေးကတော့ ကျုံပျော်မြို့ စစ်တပ်တစ်ခုထဲမှာ အမှန်တကယ်ဖြစ်ပွားခဲ့တဲ့ ဖြစ်ရပ်လေးတစ်ခုဖြစ်ပါတယ်... နာမည်တွေလောက်တော့ လွှဲထားတာပေါ့နော်..
ဗိုလ်စောကျော်စိန်... ကရင်လူမျိုး လူပျိုကြီး .. အင်မတန် အရက်ကြိုက်တတ်တဲ့ ဗိုလ်ကြီးတစ်ယောက်ပေါ့.. သဘောကောင်းသလောက် တစ်ခါတစ်လေ ဒေါသထွက်လာရင် အင်မတန်လက်မြန်တတ်တဲ့လူတစ်ယောက်.. ဒါကြောင့် သူအနားသွားတဲ့လူတွေက သူနဲ့ပေါင်းမယ်ဆို သတိထားပေါင်းရတယ်.. စိတ်နဲ့အခန့်မသင့်ရင် လက်နဲ့မှီရင် လက်နဲ့ ခြေထောက်နဲ့မှီရင် ခြေထောက်နဲ့ လှမ်းဆော်တတ်ပြီး ဘာနဲ့မှ မမှီရင်တော့ တွေ့ရာ နီးစပ်ရာနဲ့ ကောက်ပေါက်တဲ့အထိ စိတ်ကြီးတတ်တယ်.. ကွမ်းလည်း အင်မတန်ကြိုက်တတ်ပြီး သွားတွေက ကွမ်းဂျိုးတွေနဲ့ ရဲနေတာပဲ.. အသားကလည်းဖြူတော့ တစ်ခါတစ်ရဲ ညဘက်ကြီး သူ့ကို မြင်လိုက်ရရင် အသားဖြူဖြူ သွားတွေက ရဲရဲဆိုတော့ လန့်စရာပဲ.. တစ်ခါတုန်းကလည်း တပ်ထဲမှာ အသစ်ဝင်တဲ့ တပ်သားတစ်ယောက် ကင်းစောင့်တဲ့အချိန် သူက ကင်းတွေကို လိုက်စစ်ရင်း ရုတ်တရတ် အနားရောက်လာတော့ ဓါတ်မီးနဲ့လှမ်းထိုးလိုက်တာ သူကလည်း ပြန်ရယ်ပြတာနဲ့ တိုးရော အဲဒီတပ်သား ကြောက်လန့်ပြီး အော်လိုက်တာ.. အားလုံးနှိုးကုန်ရော.. အဲလောက်ထိ... သူ့မှာ သူဆိုးသမျှ ခံတဲ့ လက်ရင်းတပည့်တစ်ယောက်ရှိတယ်.. သူနာမည်က မြမောင်တဲ့.. မြမောင်ကလည်း လူဂလန့် လူဂွစာ.. သူတို့နှစ်ယောက် ဘယ်လိုပေါင်းမိလဲတော့ မပြောတတ်ဘူး.. မြမောင်ခမျာ သူ့ဆရာ စောကျော်စိန်မှ စောကျော်စိန်ဖြစ်နေတယ်.. ဗိုလ်စောကျော်စိန်ကလည်း သူ့တပည့်မှ သူ့တပည့် ကျွေးစရာရှိလည်း မြမောင်.. ခိုင်းစရာရှိလည်း မြမောင်.. ဖြစ်နေတော့ တစ်ခါတစ်လေ မြမောင် မိန်းမ မိဝါက တပွစိစိနဲ့ပေါ့.. မြမောင်ကလည်း မိန်းမကို အသေနိုင်တာ.. ဒါပေမယ့် အရမ်းလည်း ချစ်တယ်.. တစ်နေ့တော့ ဗိုလ်စောကျော်စိန် ရှေ့တန်းကို ပါသွားတယ်.. မြမောင်ကတော့ တပ်ထဲမှာပဲ နေခဲ့ရတယ်... ရှေ့တန်းမသွားခင် ဆရာတပည့်နှစ်ယောက် နှုတ်ဆက်တဲ့ ပွဲလုပ်သွားသေးတယ်.. မြမောင်ကလည်း သူ့ဆရာကို သံယောဇဉ်ကြီးတော့ ဆရာဘေးမသီ ရန်မခဘဲ ပြန်လာခဲ့ဖို့ အတန်တန်မှာတယ်.. ဗိုလ်စောကျော်စိန်ကလည်း သူပြန်လာမယ်လို့ အထပ်ထပ်ကတိပေးပြီး ရှေ့တန်းကို ထွက်သွားတယ်.. ဖြစ်ချင်တော့ ရှေ့တန်းတစ်နေရာမှာ ရန်သူအင်အားတအားများပြီး ဗိုလ်စောကျော်စိန်တို့ဘက်က အလူးအလဲခံနေရတဲ့အခါ ဒေါသကြီးတဲ့ ဗိုလ်စောကျော်စိန်ဟာ ရန်သူ့ခံကတုပ်ကို အသေခံတပ်ပြီး ဖောက်ခွဲခဲ့တယ်.. ဗိုလ်စောကျော်စိန်ကြောင့် အနိုင်ရသွားခဲ့ပေမယ့် အဲဒီတိုက်ပွဲမှာ ဗိုလ်စောကျော်စိန် ကျဆုံးသွားခဲ့ရတယ်.. ဗိုလ်စောကျော်စိန် ကျဆုံးသွားတဲ့ တချိန်တည်းမှာပဲ..
တပည့်ဖြစ်တဲ့ တပ်ကြပ်မြမောင်က ရိက္ခာပေးတဲ့ရက်မို့လို့ တပ်ကနေ အာမီရမ်တို့ ရိက္ခာစိုတွေ ရလာလို့ ၀မ်းသာအားရ အိမ်ကိုပြန်လာတယ်.. အရင်ခေတ်က တပ်မှာ ရိက္ခာစို အသားငါးတွေ ပေးတယ်.. အဲဒီနေ့က မြမောင်က သူ့ဆရာကို အရမ်းသတိရနေတာနဲ့ ဆရာ့ကို သတိရတဲ့အထိမ်းအမှတ်နဲ့ အာမီရမ်လေးနဲ့ အမဲသားကြော်လေးနဲ့ သတိရတဲ့ပွဲလေးကို တစ်ယောက်တည်းလုပ်မယ်ဆိုတဲ့ အတွေးလေးနဲ့ပေါ့.. အချိန်က ညနေ နေ၀င်ရီတရော ဖြစ်နေပြီ.. အိမ်ရောက်တာနဲ့ မြမောင် မိန်းမ မိဝါကို ခေါ်ပြီး အမဲသားစိမ်းကို ကြော်ခိုင်းလိုက်တယ်.. အဲ့လို ကြော်နေတဲ့အချိန်မှာ အမဲကြော်ကို စောင့်ရင်းနဲ့ အိမ်ရှေ့ကွပ်ပျစ်ကလေးမှာ မန်ကျီးသီးစိမ်းလေးနဲ့ ဆားလေးနဲ့ တွဲပြီး အာမီရမ် လေး ဖြေးဖြေးချင်း ဇိမ်ဆွဲသောက်ရင်း အရသာခံနေတာပေါ့.. နဲနဲလေးကောင်းလာတာနဲ့... ပါးစပ်က ပေါက်ကရတွေ လျှောက်ပြောပါလေရော... ဆရာရေ.. ဆရာကို အရမ်းသတိရတာပဲ.. အရင်တုန်းက ဒီအချိန်ဆိုရင် ကျွန်တော်နဲ့ ဆရာ ဆရာတပည့်နှစ်ယောက် ဒီကွပ်ပျစ်ကလေးပေါ်မှာ အတူထိုင်ရင်း အရက်ဖြူလေးကို ဒီလို မန်ကျည်းသီးစိမ်းလေးနဲ့ ဆားလေးနဲ့ တို့ပြီး သောက်နေကျ.. ခုတော့ ဆရာမရှိတဲ့အချိန်မှ အာမီရမ်တွေရပြီး ကျွန်တော်တစ်ယောက်တည်းသောက်နေရတယ်.. ဖြစ်နိုင်ရင် ခုချက်ချင်းကို ဆရာနဲ့ ကျွန်တော် အတူတူထိုင်ပြီး အာမီရမ်နဲ့ အမဲကြော်လေးကို အရသာခံပြီး သောက်လိုက်ချင်ပါတယ် .. ဆရာရယ်.. တပည့်အနားကို ခုပဲ ပြန်လာခဲ့ပါတော့... ဆိုပြီး မျက်ရည်တွေ ဘာတွေ ကျလို့ပေါ့.. သူပြောလို့ သိပ်မကြာလိုက်ပါဘူး.. အိမ်နောက်ဖေးမှာ တဂစ်ဂစ်နဲ့ သူ့မိန်းမ တက် နေတဲ့ အသံကြားလို့ ကမန်းကတမ်းပြေးသွားပြီး ကြည့်လိုက်တယ်.. သူ့မိန်းမ မိဝါမှာ အရင်ကတည်းက အာရုံကြောအားနည်းပြီး တက် တဲ့ ရောဂါအခံရှိတာကိုး... တစ်ခါတစ်ခါ တက်ရင် ဆေးဖိုးကုန်လွန်းလို့ သူလည်း အမြဲတမ်း သတိထားနေရတယ်.. မိန်းမကို ချစ်တာလည်း ပါမှာပေါ့.. အဲ့လို တက် တဲ့အခါ အချိန်မှီ ခြေမတွေ ဘာတွေချိုးပေးနိုင်ရင် သက်သာတယ်လေ.. ဒီလိုမှ အချိန်မမှီလို့ ဆရာဝန်ကိုပြေးခေါ်မိရင်တော့ ပိုက်ဆံကုန်တော့တာပဲ.. အဲဒါကြောင့် သူအမြဲသတိထားစောင့်ကြည့်နေရတာ.. မြမောင်သွားကြည့်လိုက်တော့ မိဝါက အိမ်နောက်ဖေး ရေကပြင်မှာ ဆန့်ဆန့်ကြီး ဖြစ်နေပြီ.. အရင်တုန်းက တက် တဲ့အခါလို အကြောဆွဲတာတို့ ဘာတို့တော့မဖြစ်ဘူးတဲ့.. အဲဒါနဲ့ မြမောင်လည်း စိတ်ပူသွားပြီး မိဝါအနားပြေးလည်းသွားရော.. အနားရောက်တာနဲ့ မိဝါက ငေါက် ခနဲ ထထိုင်ပါလေရော... ထိုင်ပြီးတာနဲ့ သူ့ဆံပင်ကို ဖြန့်ချလိုက်ပြီး ထမီကို ပုဆိုးကြီးလို ပြင်ဝတ်လိုက်တယ်.. ပြီးတာနဲ့ အနားက ကြောင်နေတဲ့ မြမောင်ကိုကြည့်ပြီး ယောင်္ကျားသံကြီးနဲ့..
" ဟူးးးး စောင့်ရတာ မောလိုက်တာ.. ရေတစ်ခွက်လောက် အရင်တိုက်စမ်းပါ... " တဲ့.. မြမောင်လည်း အံ့သြသွားပြီး ကျောက်ရုပ်တစ်ရုပ်လို ငေးကြည့်နေမိတယ်.. ဟုတ်တယ်လေ.. သူ့မိန်းမ ပါးစပ်ကထွက်တဲ့အသံကြီးက ယောင်္ကျားသံကြီး နောက်တစ်ခုက စကားသံက ခပ်ဝဲ၀ဲ..ဒီလို စကားသံမျိုး သူကြားဖူးပါတယ်.. ဘယ်မှာ ကြားဖူးပါလိမ့်လို့ စဉ်းစားနေတုန်း
" ဟေ့ကောင် မြမောင်.. မင်း ဘာကြောင်ကြည့်နေတာလဲ.. ငါ မင်းဆရာ စောကျော်စိန်လေ.. မင်းပဲ စောစောက တနေပြီးတော့.. မင်းကတော့ ထုံးစံအတိုင်း တော်တော်ငေးငေးငိုင်ငိုင် နိုင်တာပဲ.. မင်း ရေမတိုက်လည်း နေ.. ငါ့ဘာသာသွားသောက်မယ်ဆိုပြီး သောက်ရေအိုးထဲက ရေတွေ တစ်ခွက်ပြီးတစ်ခွက် ခပ်သောက်နေတော့တယ်.. မိဝါ ရဲ့ စကားသံကို မြမောင်ကြားမိတော့ မူးနေတဲ့အရှိန်လေးတောင် ပျောက်သွားပြီး လူလည်း ဘာလုပ်လို့ လုပ်ရမှန်းမသိဖြစ်နေတယ်.. မိဝါ ရေသောက်ပြီးတာနဲ့ မြမောင်ဘက်လှည့်လာပြီး
" ဒါနဲ့ ပြောရအုန်းမယ်.. မင်း စောစောက အာမီရမ်တွေ ယူလာတာ ငါတွေ့လိုက်တယ်.. အခု အဲဒါတွေဘယ်မှာလဲ .. " လို့မေးတော့တယ်.. မြမောင်လည်း အာစေးမိနေတဲ့လူလို ဖြစ်နေပြီး
" အ.. အရှေ့က ... ကွပ်.. ကွပ်ပစ်ပေါ်မှာပါ... "
နေရာသိတာနဲ့... မြမောင်ကို တိုးဝှေ့ထွက်သွားပြီး သူဦးတည်နေတာက အိမ်ရှေ့ကွပ်ပျစ်ကလေးဆီကို.. ရောက်တာနဲ့.. မိဝါက ခပ်တည်တည်ပဲ အရှေ့မှာချထားတဲ့ အာမီရမ် ပုလင်းကို ပြွတ် ကနဲ မြည်အောင် တစ်ချက် နမ်းလိုက်ပြီး ခွက်ထဲကို အားရပါးရထည့်... မော့နေတာများ တကယ့် အရက်မသောက်ရတာ ကြာလို့ အဆက်ပြတ်နေတဲ့ အရက်သမားက အရက်ပုလင်းပြန်တွေ့လိုက်သလိုပဲ.. အငမ်းမရကို သောက်နေတာ.. မြမောင်လည်း ကြောင်တောင်တောင်ဖြစ်ပြီး ပြောင်းလဲသွားတဲ့မိဝါပုံစံကို တအံ့တသြနဲ့ အနားလည်း မသွားရဲဘဲ တံခါးအကွယ်လေးကနေ ချောင်းကြည့်နေရတာပေါ့... မိဝါကတော့ မြမောင်ကို ဂရုမစိုက်နိုင်အားသေးဘူး.. လောကကြီးမှာ သူရယ်.. အာမီရမ်ပုလင်းရယ် ပဲရှိသလို သောက်ကောင်းနေတုန်း... မြမောင် တော်တော်အံ့သြနေတယ်.. အရင်တုန်းက အရက်ဆိုရင် သိပ်မုန်းတဲ့မိဝါ.. အရက်နံ့ရရင်တောင် အဝေးကနေ သိတဲ့မကြိုက်တဲ့မိဝါ.. သူများ အရက်သောက်လာရင် အိပ်ယာခွဲအိပ်တဲ့အထိ အရက်ကိုမုန်းတာ.. ချစ်တာက ချစ်တာသက်သက်ပဲ.. အရက်ကို မုန်းတာက မုန်းတာသက်သက်ပဲလို့ ကြွေးကြော်ထားတဲ့ သူ့မိန်းမ.. အခုတော့ တစ်ခါတစ်ခါ အရက်ငှဲ့ရင် တစ်ခွက်ကို လေးပက်နှုန်းလောက်နဲ့ ငှဲ့ ငှဲ့ပြီး အာမီရမ် ပြင်းပြင်းကြီးကို ကစ်နေလိုက်တာများ ကြွက်တွင်းထဲ ရေနွေးပူလောင်းသလိုပဲ တဲ့.. ( ကြွက်တွင်းထဲ ရေနွေးပူလောင်းတယ်ဆိုတာ အထဲက ကြွက်ကို သေစေချင်တဲ့ဒေါသနဲ့ တရမန်းကြမ်းလောင်းထည့်တာကို ပြောတာ.. ) မြမောင် နည်းနည်းပဲသောက်ရသေးတဲ့ အာမီရမ် ပုလင်းက မိဝါလက်ချက်နဲ့တင် သုံးပုံ နှစ်ပုံလောက် ကုန်သွားတယ် .. အမယ်.. မန်ကျည်းသီးလေးကိုတောင် ဆားလေးနဲ့တို့ပြီး ဂွပ် ခနဲ ဂျွတ်ခနဲ ကိုက်နေလိုက်ပုံများ.. ကြည့်ရင်းနဲ့တောင် ဗိုလ်စောကျော်စိန်နဲ့ တူလာသလိုလို .. မြမောင်လည်း သူ့မိန်းမ မိဝါ အရက်ကို အားရပါးရသောက်နေတာမြင်တော့ သူလည်း ကြောက်စိတ်တွေ ပြယ်ပြီး အရက်သောက်ချင်တဲ့စိတ်တွေ ပြန်ဖြစ်လာတော့တယ်... အဲဒီအချိန်မှာ မိဝါက..
" ဟေ့.. မြမောင်.. လာလေကွာ..မကြောက်ပါနဲ့ကွာ..ငါ မင်းဆရာ စောကျော်စိန်ပါ.. မင်းပဲ စောစောက တနေပြီးတော့ ငါလည်း ခုမှပဲ အာသာပြေသွားတော့တယ်ကွာ.. " ဆိုပြီး လှမ်းခေါ်လိုက်တယ်.. အဲဒီအချိန်မှာ .. မြမောင်လည်း အရက်အရမ်းသောက်ချင်နေပြီလေ.. မီးစင်ကြည့်ကမှ .. ဆိုပြီး..
" ဟုတ်ကဲ့.. ဗိုလ်ကြီး.. " ဆိုပြီး အားရပါးရ အနားပြေးသွားလိုက်တယ်.. အဲဒီအခါ မိဝါက
" အေးလကွာ.. အဲ့လို လုပ်စမ်းပါ... အရက်ဆိုတာ အဖော်လေးနဲ့ သောက်တာမှ အရသာရှိတာကွ... အိမ်နောက်ဖေးက အမဲကြော်တွေလည်း ယူခဲ့ကွာ.. နောက်ပြီး မင်းအတွက် ခွက်ပါ ယူခဲ့.." ဆိုပြီး အသက်ရှင်စဉ်ကလိုပဲ ရင်းရင်းနှီးနှီးကြီး ခိုင်းလိုက်တယ်.. မြမောင်လည်း ကြောက်ကြောက်လန့်လန့်နဲ့ အိမ်နောက်က အမဲကြော်တွေ သွားယူတယ်.. အမဲကြော်တွေတော်တော်များများက ကျက်လို့ ပန်းကန်ထဲတောင် ထည့်ပြီးနေပြီ.. သူ့မိန်းမ မိဝါက အမဲကြော်ပြီးလို့ လက်ဆေးမလို့ အိမ်နောက်က ရေကပြင်သွားရင်း မေ့လဲသွားခဲ့တာလေ.. အဲဒါနဲ့ မြမောင်လည်း သူ့အတွက် ခွက်ကလေးပါ ဆွဲရင် မိဝါတစ်ဖြစ်လဲ သူ့ဆရာစောကျော်စိန် ရှိရာ အိမ်ရှေ့ကွပ်ပြစ်ကလေးဆီသို့ ခပ်မြန်မြန်လေးလျှောက်လှမ်းလိုက်ခဲ့လိုက်ပါတော့တယ်....
အိမ်ရှေ့ ကွပ်ပျစ်ကိုလည်းရောက်ရော အမဲကြော်ပန်းကန်ကို ဗိုလ်စောကျော်စိန်ရှေ့ကို ချပေးလိုက်တယ်.. ပြီးတော့ သူ့အတွက် ခွက်ထဲကိုလည်း အရက်ငှဲ့တာပေါ့.. ဗိုလ်စောကျော်စိန်က အရက်ကို ပထမပိုင်းသောက်သလောက် မသောက်တော့ဘဲ အရက်ကလေးသောက် အမဲကြော်လေး တမြုံမြုံဝါးရင်း မျက်လုံးလေး မှေးစင်းပြီး ဇိမ်ခံနေတယ်... နောက်တော့ သူ့တိုက်ပွဲအတွေ့အကြုံတွေကို အားရပါးရ ဖောက်သည်ချပါလေရော..
သူရှေ့တန်းမှာတုန်းက ရန်သူတွေနဲ့ သူတို့တပ်တွေ အင်အားမမျှတော့ စိတ်ကြီးတဲ့ သူ့ဗီဇအတိုင်း ရန်သူတွေကို ဖိပစ်လိုက် ၀ပ်လိုက်လုပ်နေတာ ကြာတော့ စိတ်မရှည်တော့ဘဲ.. မတ်တပ်ရပ်ပြီး သူကိုင်တဲ့ အော်တိုစက်သေနတ်ကြီးကို ကိုင်ပြီး ထဆွဲတာ.. ရန်သူဘက်က ငါးယောက်လောက်ကျသွားတဲ့အကြောင်း၊ နောက်.. ရန်သူ့ဘက်က ခံတပ်ကြီးတစ်ခုကြောင့် သူတို့တပ်ဖွဲ့က အဖွဲ့သားတွေ တစ်ယောက်ပြီးတစ်ယောက် ကျသွားတာကို မြင်ခဲ့ရတဲ့အကြောင်း၊ နောက်ဆုံး အဝေးပစ်တပ်စိတ်ကို ပစ်ကူပေးဖို့ ခေါ်ထားပေမယ့် အချိန်ကြာနေတာကြောင့် စိတ်မရှည်တော့ဘဲ မိကျောင်းလိုတွားသွားခဲ့တဲ့အကြောင်း၊ ရန်သူ့ဘက်က ကျည်ဆန်တွေကလည်း သူ့အနားမှာ ပိတုန်းကောင်တွေလို တ၀ီဝီနဲ့ ဖြတ်သန်းသွားနေကြောင်း၊ နောက်ဆုံး လက်ပစ်ဗုံးနဲ့ ရန်သူ့ခံတပ်ထဲ ပစ်လိုက်တဲ့အချိန်မှာပဲ ရန်သူ့ဘက်က ပစ်လိုက်တဲ့ ကျည်ဆန်တွေက သူ့ခန္ဓာကိုယ်ထဲ ဖောက်ထွင်းဝင်ရောက်သွားပြီး သူ ကျဆုံးခဲ့ရတဲ့အကြောင်းကို တဖွဲ့တနွဲ့ ပြောပြရှာတယ်.. ဒါပေမယ့် သူ့မျက်နှာကိုကြည့်ရတာ တိုက်ပွဲမှာ ကျဆုံးခဲ့ရလို့ ၀မ်းနည်းနေတဲ့ပုံ တစ်စက်မှ မရှိဘူး.. သူက တစ်ကိုယ်တည်းလူပျိုကြီးပဲလေ..
ဗိုလ်စောကျော်စိန်က စိတ်လဲရဲတယ်.. လုပ်ရဲခံရဲတဲ့ သတ္တိလည်းရှိတယ်..
" ငါ့ ကိုယ်မှာ ဒီလောက် ကျည်ဆန်တွေမှန်သွားလိုက်ကတည်းက ငါသေမယ်ဆိုတာ သိလိုက်ပြီပေါ့.. ဒါပေမယ့်.. ငါတို့ရဲ့ ရန်သူကောင်တွေကိုပါ ငါနဲ့အတူ ခေါ်သွားနိုင်တာ ၀မ်းသာတယ်ဝေ့.. အဲဒီစစ်ဖြစ်တဲ့နေရာမှာ ငါတို့ဘက်က သေတဲ့ကောင်တွေ တချို့ရော ရန်သူ့ဘက်ကသေတဲ့ကောင်တွေရော တောထဲမှာ ဟိုပြေးဒီပြေးနဲ့ပေါ့ကွာ.. နောက်ပြီး ငါတို့စစ်ဖြစ်နေတဲ့နားမှာ ရပ်ကြည့်နေကြတဲ့ လူလိုလို မျောက်ဝံလိုလို အကောင်နီနီကြီးတွေလည်း ရှိတယ်ဝေ့.. ဘာကောင်လဲတော့ ငါလည်းမပြောတတ်ဘူး.. ငါလည်း တစ်ခါမှ မမြင်ဖူးဘူးလေ.. နောက် ဒီလောက် သေနတ်တွေ ပစ်ခတ်နေတဲ့ကြားမှာ သေတဲ့အကောင်တွေက ထွက်တဲ့ သွေးစသွေးနတွေနဲ့ ၀မ်းတွင်းကလီစာတွေကို လျှာနဲ့ ၀င်ဝင်လျက်နေတဲ့ အကောင် မည်းမည်းကြီးတွေကိုလည်း တွေ့ရတယ်ကွာ.. ဒီအကောင်တွေကို ဘယ်သူမှ မမြင်ရဘူးကွ.. ငါတောင် သေသွားလို့တွေ့ရတယ် ထင်တာပဲကွာ.. ဒီမြင်ကွင်း မြင်ရတာ တစ်စက်မှ စိတ်ချမ်းသာစရာမရှိပါဘူးကွာ... ငါလည်း ဆက်မကြည့်ချင်တော့တာနဲ့ ငါ့အပေါင်းအသင်းတွေကို နှုတ်ဆက်မယ်ဆိုပြီး တပ်ရင်းကို ပြန်လာခဲ့လိုက်တယ်... လမ်းမှာလည်း စောစောကမြင်ခဲ့တဲ့အကောင်တွေလို မည်းမည်းကောင်တွေရော ပိန်သေးသေးကောင်တွေရော အရပ်ရှည်ရှည်ကောင်တွေရော မျိုးစုံပဲ မြင်ခဲ့ရတယ်.. နောက်ဆုံး တပ်ရင်းကို ပြန်ရောက်တာတောင် သူ့အပေါင်းအသင်းတွေနဲ့ ချက်ချင်းတွေ့လို့မရလို့ တပ်ရင်းထိပ်က ညောင်ပင်ကြီးမှာ နေခဲ့ရတယ်.. နောက်ဆုံး မင်း ရိက္ခာရုံကနေ အမဲသားတွေ အာမီရမ်တွေ အများကြီး သယ်လာတာတွေ့လို့ ငါ့ တပည့်နဲ့ အတူသောက်ချင်လို့ လိုက်လာတာကွ..." လို့ သူ့အဖြစ်ကို ပြောပြနေတယ်..
မြမောင်ကတော့ အရက်သောက်ဖို့တောင်မေ့ပြီး သူ့ ဆရာပြောပြတဲ့အကြောင်းအရာတွေကိုသာ မျက်လုံးထဲ ပုံဖော်ရင်း အရက်ခွက်ကို ကိုင်ပြီး တွေတွေကြီးနားထောင်နေပါတယ်..
ဗိုလ်စောကျော်စိန်က စကားလည်း ဆုံးရော ဘေးကိုကြည့်လိုက်တဲ့အခါ ငေါင်တောင်တောင်ကြည့်နေတဲ့ မြမောင်ကိုလည်းတွေ့ရော..
" ဟေ့ကောင်... သောက်ကွာ ဒီတိုင်းကြီးမနေနဲ့. .Cheer ချကွာ.. "
ဆိုပြီး မြမောင်ကို လောကွတ်လုပ်ပါတယ်.... သူ ကိုယ်တိုင်လဲ တွယ်တာပေါ့.... ဒါနဲ့ တညလုံး ည ၈ နာရီလောက်တည်းက ထိုင်သောက်လိုက်တာ မနက် နှစ်နာရီလောက်အထိ ထိုးသွားပါတယ်..မြမောင်ကတော့ အစပိုင်းမှာ ထူးဆန်းတယ်ဆိုပြီး စကားတွေ ပြောလိုက် သောက်လိုက် လုပ်နေပေမယ့်.. ကြာတော့ ပျင်းလာပါတယ်.. အပူးခံနေရတဲ့ သူ့ မိန်းမ အတွက်လဲ စိတ်ပူလာတယ်လေ.
ဒါနဲ့... စောကျော်စိန် စကားစလာတာနဲ့ "သောက် ဆရာ သောက် "ဆိုပြီး.. အတင်းထိုးတိုက်တော့တယ်.. ဗိုလ်စောကျော်စိန်ကတော့ မမောသေးပါဘူး.. သူ့တပည့်နဲ့ ပြန်တွေ့ရတာရော အရက်တ၀ကြီးသောက်နေရတာရော ကြောင့် လက်ရှိဘ၀ကိုတောင် မေ့နေသလိုပါပဲ..
ဟိုးးးးးးးးးး သူငယ်ငယ်လေးဘက် သွား အကြောင်းကနေ သူ အသက်တစ်ဖြည်းဖြည်းကြီးလာလို့ ဘ၀အတွေ့ အကြုံ ရတဲ့ အကြောင်းတွေပြောပြနေပါတော့တယ်.. သူ့ အမေ ကဘယ်လို သူ့ အဖေက ဘယ်လို .. သူက ဘယ်လိုစသည်ဖြင့် ပြောနေလိုက်တာ..
မပြီးတော့ပါဘူး.. ဒါကြောင့် မြင့်မောင်က အရက်ကုန်ရင်လည်းကုန်ပါစေ.. ဒီလူကြီး မူးပြီးမှောက်သွားရင် ပြန်ထွက်သွားမှာပဲ ဆိုတဲ့ သဘောနဲ့ ဗိုလ်စောကျော်စိန် ခွက်ထဲမှာ ကုန်တာနဲ့ သောက်.. သောက် ဆရာ.. ဆိုပြီး အရက်တွေကို အဆက်မပြတ်ကြီး ထပ်ထပ် ငှဲ့ပေးပါတယ်..ဗိုလ် စောကျော်စိန် ခမျာလည်း စကားကို ကောင်းကောင်း မပြောနိုင်တော့ပါဘူး .. မြမောင် အရက်ငှဲ့ ဘယ်လောက်သွက်လဲ ဆိုရင်ငါ ဟိုးးးး ရှမ်းပြည်သွားတုန်းကပေါ့ကွာ... လို့ ဆိုပြီး စကားစလိုက်တာနဲ့.. သောက်ဆရာ သောက်.. .ဆိုပြီး ထည့်ပေးပြန်ရော.. အဲဒီ တစ်ခွက်လည်းကုန်ရော... အဲ့ဒါနဲ့ ရှမ်းပြည်မှာလေ... လို့ စကားဆက်ပြန်ရင် သောက် ဆရာသောက် ဆိုပြီး မြင့်မောင်က ထပ်ငှဲ့ပေးပြန်ရော.. ဒီလိုနဲ့ ဗိုလ်စောကျော်စိန်တစ်ယောက်လည်း သုံးခွန်းပြည့်အောင်တောင်မပြောနိုင်ဘူးဆိုပဲ.. ဒီလိုနဲ့ မြမောင်ရိက္ခာရလာတဲ့ အာမီရမ်ငါးလုံးလုံး ဟာ တစ်ပိုင်းလောက်ပဲ ကျန်ပါတော့တယ်..ဗိုလ်စောကျော်စိန်ဝင်ပူးနေတဲ့ မိဝါ ကချည်းသောက်တာ လေးလုံး ကျော်ကျော်လောက်ရှိတယ်... ဒီလိုနဲ့ အချိန်တဖြေးဖြေးလင့်လာပြီးတော့ မနက် လေးနာရီထိုးတော့မယ်.. ကြက်တွန်သံတွေ စကြားလိုက်တာနဲ့ ဗိုလ်စောကျော်စိန်ဝင်ပူးခံနေရတဲ့ မိဝါက ဇတ်ခနဲဖြစ်သွားပြီး
" အေး.. မင်းနဲ့ စကားပြောလို့လည်း ကောင်းတယ်.. အရက်သောက်ရတာလည်း ကောင်းတယ်.. ဒါပေမယ့် ငါပြန်ဖို့အချိန်ရောက်ပြီ.. ငါလည်းတော်တော်ကြီးကောင်းသွားပြီ.. မင်း ငါနေတဲ့ နေရာကိုလိုက်ပို့.." ဆိုပြီး ပြောပါတယ်.. အဲဒီအခါ မြမောင်က ၀မ်းသာသွားပြီး
" ဘယ်ကိုလိုက်ပို့ရမလဲ ဆရာ.. "
" ငါနေတဲ့ တပ်ထိပ်က ညောင်ပင်ကြီးကိုပေါ့.. "
" အော် ဟုတ်ကဲ့ပါ.. " ဆိုပြီး မိဝါတစ်ဖြစ်လဲ ဗိုလ်စောကျော်စိန်ကို တွဲပြီး ညောင်ပင်ကြီးကိုလိုက်ပို့တယ်.. လမ်းတလျှောက်လုံးလည်း ခွေးတွေက ဟောင်တဲ့ကောင်ကဟောင် အူတဲ့ကောင်က အူတာပေါ့.. ညောင်ပင် အစပ်လည်း ရောက်ရော.. မိဝါပါးစပ်ကနေ.. ငါ သွားပြီလို့ တစ်ခွန်းတည်းပြောပြီး ပုံလျက်သားလဲကျသွားတယ်.. အဲဒီအခါ မြမောင်လည်း မိဝါကိုပွေ့နေတုန်း မိဝါ သတိပြန်ရလာတယ်.. သတိရလာလာချင်းပဲ ရှိုက်ကြီးတငင် ငိုကြွေးပြီး သူ နောက်ဖေးရေကပြင်မှာ လက်ဆေးနေတုန်း ဗိုလ်စောကျော်စိန် ရောက်လာကြောင်း သူကလည်း ရှေ့တန်းက ပြန်လာပြီထင်ပြီး လှမ်းနှုတ်ကဆက်မိကြောင်း၊ ထိုအခါ ဗိုလ်စောကျော်စိန်မှ နင့်ဆီ ငါခဏလာမလို့ လို့ ပြောတဲ့အခါ.. လာပေ့ါဆိုပြီး ပြီးစလွယ် ပြောလိုက်မိတဲ့ခဏမှာ ရေကပြင်အောက်ကနေ သူ့ရှေ့ချက်ချင်းရောက်လာလို့ ကြောက်လန့်ပြီး အော်ဟစ်ရန်ပြင်လိုက်စဉ် နောက်ပိုင်းအဖြစ်အပျက်တွေ သူ ဘာမှ သတိမရတော့ကြောင်း အခု ဒီနေရာကို ရောက်လာမှ အသိစိတ်ပြန်ဝင်လာခဲ့တာဖြစ်ကြောင်း ပြောပြတယ်.. မိဝါပုံစံက အာမီရမ်ငါးလုံးနီးပါး သောက်ထားပေမယ့် မူးနေတဲ့အရိပ်အယောင် မမြင်ရဘူးလေ.. အဲဒါနဲ့ မြမောင်လည်း မိဝါကို အိမ်ပြန်ခေါ်သွားပြီး ဘုရားသောက်တော်ရေများကို စွန့်ပယ်ပြီး သောက်စေတယ်.. သူလည်း သောက်တယ်.. အဲဒီနောက်ပိုင်း မြမောင်လည်း အရင်ကလို အရက်မသောက်ဖြစ်တော့ဘဲ ဘုရားတရားပိုလုပ်လာတယ်.. မိဝါကလည်း ယောင်္ကျားရဲ့ပြောင်းလဲလာတဲ့အဖြစ်ကို ၀မ်းသာကျေနပ်နေရှာတာပေါ့... ဒီလိုနဲ့ ဗိုလ်စောကျော်စိန်နဲ့ အဆက်အသွယ် ပြတ်သွားလိုက်တာ နောက် သုံးလလောက်ကြာတဲ့အခါ မြမောင်အိမ်မက်ထဲကို ဗိုလ်စောကျော်စိန် ရောက်လာပါတော့တယ်.. ပြီးတော့ ပထမတော့ မြမောင်အနေနဲ့ ဘုရားတရားအလုပ်တွေလုပ်လာတဲ့အတွက် သူ မြမောင်တို့အိမ်ကိုလာလို့မရတော့ကြောင်း၊ အခုလည်း အိမ်စောင့်နတ်ကို အတန်တန်ခွင့်ပန်တောင်းပန်ပြီးမှ မြမောင်ရဲ့အိမ်မက်ထဲကိုလာရတာဖြစ်ကြောင်း၊ အခုတစ်ခါ လာတာက အရင်တစ်ခေါက်ကလို မဟုတ်ဘဲ သူ ဒီဘ၀မှာနေရတာ မပျော်တော့တဲ့အတွက် အကူအညီတောင်းဖို့ဖြစ်ကြောင်း ပြောပြတယ်.. ထိုအခါ မြမောင်က ဘာကူညီရမလဲ.. သူတတ်နိုင်တာဆိုရင် ကူညီပေးပါ့မယ်လို့ ပြောတဲ့အခါ သူနေတဲ့လူပျိုဆောင်တန်းလျားရဲ့ လှေခါးအဆင့်ခြေရင်းမှာ သူ စုဆောင်းထားတဲ့ငွေကြေးလေးများကို ၀ါးကျည်ထောက်တစ်ခုထဲထည့်ပြီး မြုပ်နှံထားကြောင်း၊ အဲဒါလေးကို ပြန်လည်တူးဖော်ပြီး သူ့အတွက် ကုသိုလ်ကောင်းမှုလုပ်ပေးစေလိုကြောင်း၊ အလှူလုပ်ပြီး အမျှဝေတဲ့အခါမှာလည်း သူနေတဲ့ ညောင်ပင်ကြီးကိုလာပြီး သူနာမည်နဲ့ခေါ်စေလိုကြောင်းပြောကြားပြီး ပျောက်ကွယ်သွားပါတယ်... မြမောင်ကလည်း သူ့ဆရာအတွက် စိတ်မကောင်းဖြစ်မိပြီး အိမ်မက်ထဲကအတိုင်း အထက်လူကြီးများနဲ့ တိုင်ပင်ပြီး လူပျိုဆောင် လှေခါးရင်းကို တူးဖော်ကြည့်တဲ့အခါ အိမ်မက်ထဲကအတိုင်း ဗိုလ်စောကျော်စိန် ပြောတဲ့ ၀ါးကျည်တောက်ကြီးတွေ့ပြီး ခွဲကြည့်တဲ့အခါ ငွေကြေးများကိုတွေ့ရတဲ့အတွက် အားလုံးပေါင်းစုပြီး ဗိုလ်စောကျော်စိန်အတွက် ထပ်ဆင့်အမိန့်စာပြန်ပေးရန်နှင့် အလှူလုပ်ပြီး အမျှဝေပေးရန်ပြုလုပ်ဆောင်ရွက်ကြပါတော့တယ်.. ညောင်ပင်ကြီးကို သွားပြီး ဗိုလ်စောကျော်စိန် နာမည်ကို ခေါ်ရာမှာ ညောင်ကိုင်းတစ်ကိုင်းတည်းက လေမတိုက်ပါဘဲ သိသိသာသာကြီးလှုတ်ရှားသွားတာ အားလုံးတွေ့မြင်လိုက်ရပါတယ်.. အဲဒီနောက်မှာတော့ အမျှဝေပွဲလုပ်ပြီး သာဓုခေါ်တဲ့အချိန်မှာလည်း ဗိုလ်စောကျော်စိန်အတွက် သီးသန့်နေရာခင်းထားတဲ့အခင်းက လူတစ်ယောက်ထိုင်နေသလို တွန့်ကြေနေပြီး တရားနာလာတဲ့ပရိတ်သတ်ထဲက တချို့က ဗိုလ်စောကျော်စိန်ကို ပရိသတ်ထဲမှာ ရိုးတိုးရိပ်တိတ်မြင်လိုက်ရကြောင်း ပြောပြကြပါတယ်.. အမျှဝေပြီး သာဓုခေါ်တဲ့အချိန်မှာလည်း အသံသြသြကြီးဖြင့် သာဓုခေါ်သံကို ထူးထူးခြားခြားကြားလိုက်ကြရပြီး အားလုံးကြက်သီးမွှေးညင်းများပါ ထသွားရပါတော့တယ်.. အမျှဝေပြီးပြီးတာနဲ့ တစ်ခါတည်း ထပ်ဆင့်အမိန့်ပြန်တဲ့ကြော်ငြာစာတမ်းကို အထက်လူကြီးများမှ ဖတ်ကြားပါတော့တယ်.. အဲဒီနောက်ပိုင်းမှာတော့ မြမောင်ရဲ့ အိမ်မက်ထဲကို ဗိုလ်စောကျော်စိန်တစ်ယောက် ပျော်ရွှင်စွာရောက်လာပြီး သူဒီဘ၀က ကျွတ်လွတ်သွားတဲ့အတွက် အထူးကျေးဇူးတင်ကြောင်း ပြောဆိုပြီး ပျောက်ကွယ်သွားပါတော့တယ်.. မြမောင်လည်း ဆရာ့အတွက် ကျေနပ်ဝမ်းသာခြင်းများစွာဖြင့် အရက်ဖြတ်လိုက်ပြီး ဘုရားတရားအလုပ်ကို ပိုမိုလုပ်ကိုင်ရင်း အေးချမ်းစွာနေထိုင်သွားပါတော့တယ် ခင်ဗျာ..
No comments:
Post a Comment